Nesta imaxe, un quinteto de monxes pasean polos arredores da vila, a carón da muralla que rodeou a primitiva clausura do cenobio. Desde Outeiro gozan do locus amoenus samonense e ollan a vila coa casa do bar Centro á dereita, ao lado do río a anterior casa do Concello e o resto daquela pequeniña vila estirándose entre a estrada e o río e máis arriba o barrio da Torre. No horizonte asoma o Carballal co seu perfil elevado, sempre atento e ollando o val con panorámicas de privilexio. A paisaxe rezuma exuberancia e imprime o seu selo e carácter nos afortunados moradores do lugar.
