Desde Madrid, Fidel Torreiro envíame esta imaxe do ano 1968. Foi tomada na subida ao monte Carballal, á beira do reemisor de televisión.
Con esta entrada acompaño o ÁLBUM que me envía Ricardo Diéguez González desde Ponferrada. Contén moitas imaxes pero posúe ademais o interese de contar con dous vídeos gravados na igrexa. O primeiro recolle o noso coro de voces improvisadas entoando "Andarei na presenza do Señor". No segundo recréase na peza de órgano con que nos agasallou o compañeiro Gerardo Vega del Riego no remate da misa.
Hai menos dun ano a fachada da igrexa cobrou novo esplendor despois das obras de restauración e impermeabilización que executou a Consellería de Cultura.
El 30 de abril de 1997 nos reuníamos por segunda vez en el Monasterio de Samos. Asistimos 45 ex-compañeros, los que aparecemos en la foto junto a los Padres Pedro, Ángel, Martín, Agustín y Victoriano. La estatua de Feijoo nos servía de telón de fondo como en tantas otras ocasiones.
San Clodio garda para moitos de nós entrañables lembranzas. A promoción de 1958 iniciara aquí a súa etapa de colexiais. Moitos dos demais vendimaron neste lugar, cerne da viticultura do Ribeiro. Foron os monxes de San Clodio os que introuciron nesta bisbarra o cultivo da vide.
Na actualidade, convertido en hotel monumento loce un estado impecable que nada ten que ver co edificio que nós lembramos de antano.
Non me parece mala idea ir confeccionando un álbum daqueles lugares que conformaron o noso espazo vital máis íntimo en Samos. O dormitorio era un deses lugares. Creo lembrar a inscrición con que figuraba na porta que dá á sala de xogos: CUBICULUM. Era unha maneira de ir aprendendo latín.
A sala de xogos era a antesala do colexio. De alí accedíase ás aulas, ao dormitorio e aos baños. Era un espazo amplo, aberto á luz do suroeste que franqueaba as enormes cristaleiras que miran á estatua de Feijoo no claustro grande e ao Carballal, muralla natural que couta e limita no espazo os horizontes.
Unha mesa de pimpón, un billar e un futbolín eran suficientes para desatar a algarabía mesurada dos escolantes. 
Nun descanso do partido de fútbol , cando se xogaba na estrada, a carón da igrexa.
